ᐋ ᑎᐹᑐᑖᒡ COMEV

ᐋ ᐐᐦ ᐃᔑ ᐱᑯᐦᑖᑭᓂᐎᒡ

ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐃᔑ ᑖᐦᑭᐦᐄᒑᐱᔨᔨᒡ ᒑᒀᔨᐤ ᐊᔅᒌᐦᒡ ᑭᔮᐦ ᐱᒫᑎᓰᐎᓂᐦᒡ (ᑳ ᐙᐙᐱᐦᑎᐦᒡ ᒑᒀᔨᐤ – COMEX) ᐋᐅᒄ ᑎᐲᐙ ᐹᒥᐱᔨᐦᐄᓱᒡ ᐊᓂᑖᐦ ᐋ ᐙᐐᐦᑎᐦᒡ ᐋ ᐃᔅᐱᔨᔨᒡ ᐅᑖᐱᑎᓰᐎᓂᐙᐤ ᑎᐹᔨᐦᒋᒑᓯᐤᐦ ᑳ ᓈᓈᑭᒋᐦᑖᔨᒡᐦ ᐋ ᐅᔑᐦᑖᑭᓂᐎᒡ ᐋᐱᑎᓰᐎᓐ, ᐊᔅᒌ ᑭᔮᐦ ᐋ ᒫᔑᐦᑖᑭᓂᐎᒡ ᐃᔨᐦᒡ ᐋ ᐃᔅᐱᔨᒡ ᒌᔑᒄ᙮ ᐋᐅᒄ ᐋ ᐐᐦ ᐃᔑ ᐱᑯᐦᑖᑭᓂᐎᒡ ᒑ ᐐᒋᐦᑖᑭᓂᐎᒡ ᐋ ᓈᑭᑎᐙᔨᐦᑖᑭᓂᐎᒡ ᒥᔪᐱᒫᑎᓰᐎᓐ ᑭᔮᐦ ᐊᔅᒌ ᑭᔮᐦ ᒑ ᒌ ᒥᔪᐱᔨᒡ ᐊᐙᓂᒌ ᐅᐱᒫᑎᓰᐎᓂᐙᐦᒡ ᐊᓂᒌ ᐋ ᐊᑎ ᐐᒋᒡ ᐊᓂᑖᐦ ᐊᔅᒌᐦᒡ ᐋ ᐅᐦᒋ ᑎᐹᔨᐦᑖᑯᐦᒡ ᒉᐃᒥᔅ ᐯᐃ ᑭᔮᐦ ᒌᐙᑎᓐ ᑯᐯᓐ ᓂᔅᑯᒧᐎᓂᐦᒡ  (JBNQA) ᐋᐅᒄ ᐊᓐ ᐊᔅᒌ ᐲᓯᒸᐦᑖᐦᒡ ᐋ ᐃᐦᑎᑯᐦᒡ ᐊᓂᑦᐦ 55 ᑳ ᐱᒫᐹᑭᔥᑖᒡ ᐊᔅᒌᐅᓯᓂᐦᐄᑭᓂᐦᒡ᙮

ᐋ ᐃᔑ ᐋᐱᑎᔒᔥᑖᑭᓂᐎᒡ

ᐊᓂᒌ ᑳ ᐙᐙᐱᐦᑎᐦᒡ ᒑᒀᔨᐤ, ᐋᑯᑦᐦ ᑳ ᐅᐦᒋ ᐅᔑᐦᑖᑭᓂᐎᒡ ᐊᓂᑦᐦ ᐱᔅᑭᑎᓯᓂᐦᐄᑭᓐ 22 ᐅᐦᒋ ᐊᓐ ᒉᐃᒥᔅ ᐯᐃ ᑭᔮᐦ ᒌᐙᑎᓐ ᑯᐯᒃ ᓂᔅᑯᒧᐎᓐ (JBNQA), ᐋᔪᐎᒄ ᐅᑖᐱᑎᓰᐎᓂᐙᐤ ᒑ ᐐᐦᑎᒧᐙᒡ ᐊᓂᔮᐦ ᑎᐹᔨᐦᒋᒑᓯᐤᐦ ᑳ ᓈᓈᑭᒋᐦᑖᔨᒡᐦ ᐋ ᐅᔑᐦᑖᑭᓂᐎᔨᒡ ᐋᐱᑎᓰᐎᓃᔨᐤ, ᐊᔅᒌᔨᐤ ᑭᔮᐦ ᐋ ᒫᔑᐦᑖᑭᓂᐎᒡ ᐃᔨᐦᒡ ᐋ ᐃᔅᐱᔨᒡ ᒌᔑᒄ ᑭᔮᐦ ᒫᒃ ᐄᔨᔨᐤ ᐄᓅ ᑎᐹᔨᐦᒋᒑᐎᓂᔨᐤ, ᐊᓂᔮ ᑖᑆᐦ ᐋ ᐃᔑᓈᑯᓂᔨᒀ ᒑ ᐱᒋᔅᑎᔓᐙᑎᒥᔨᒡᐦ ᐋᐱᑎᓰᐎᓂᔨᐤ ᐋ ᐐᐦ ᒋᐦᒋᐱᔨᐦᑖᑭᓂᐎᔨᒡ ᑭᔮᐦ ᒫᒃ ᐋᑳ ᒑ ᐱᒋᔅᑎᔓᐙᑎᒥᔨᒡᐦ ᒥᔔ ᐊᓂᔮ ᐋ ᒌ ᐙᐙᐱᐦᑎᐦᒡ ᐊᓂᔮ ᐋ ᐃᔑᓈᑯᓂᔨᒡ ᐋ ᓂᑑᒋᔅᒑᔨᐦᑖᑭᓂᐎᔨᒡ ᑖᓐ ᒑ ᐃᔑ ᑖᐦᑭᐦᐄᒑᐱᔨᔨᒡ ᐊᔅᒌᐦᒡ ᑭᔮᐦ ᐋ ᐙᐙᐱᐦᑖᑭᓂᐎᔨᒡ ᑖᓐ ᒑ ᐃᔑ ᑖᐦᑭᐦᐄᒑᐱᔨᔨᒡ᙮ ᐊᓂᑦᐦ ᓈᐦᐄᐱᔨᔨᒡ, ᐅᒌ ᑳ ᒫᒨᐱᒡ ᒋᑭ ᐅᔮᔨᐦᑎᒧᒡ ᑖᓂᑖᐦ ᒑ ᐃᔑ ᐱᒥᐱᔨᔨᒡ ᐋᐱᑎᓰᐎᓂᔨᐤ, ᑭᔮᐦ ᒀᔣᓐ ᓂᑐᐙᔨᐦᑖᑯᓂᔨᒑ, ᒋᑭ ᐐᐦᑎᒧᒡ ᑯᔨᔅᒄ ᒑ ᐃᐦᑎᓈᓂᐎᒡ ᒑ ᐅᐦᒋ ᓂᑳᐦᐄᑭᓂᐎᒡ ᒑᒀᓐ ᑭᔮᐦ ᒫᒃ ᐋ ᒫᒦᓄᐱᑎᑭᓂᐎᒡ ᒑᒀᓐ᙮

ᐋᒄ ᒫᒃ ᐅᒌ ᑳ ᐙᐙᐱᐦᑎᐦᒡ ᒑᒀᔨᐤ ᐙᐙᐱᐦᑎᒧᒡ ᒥᓯᐙᒡ ᐋᐱᑎᓰᐎᓐᐦ ᐋ ᐹᒋ ᐱᒋᔅᑎᓂᑭᓂᐎᔨᒡᐦ ᐋ ᓂᑐᐙᔨᐦᑖᑯᓂᔨᒡᐦ ᒑ ᐙᐙᐱᐦᑖᑭᓂᐎᔨᒡᐦ ᐊᓂᔮ ᐋ ᐃᔑ ᐐᔓᑖᔨᒡ ᐱᔅᑭᑎᓯᓂᐦᐄᑭᓐ II ᐅᐦᒋ ᐊᓐ ᐐᔓᐙᐎᓐ ᒑ ᐃᔥᐱᔥ ᒥᔻᔑᒡ ᐊᔅᒌ (EQA), ᐋ ᐃᔮᐱᒋᐦᑖᑭᓂᐎᒡ ᐊᓐ ᐋ ᒥᔻᒡ ᑭᔅᒋᐦᐅᐎᓐ ᐅᐦᒋ ᐊᓂᑖᐦ ᑯᐯᒃ ᑎᐹᔨᐦᒋᒑᓰᓈᐦᒡ ᑭᔮᐦ ᐄᔨᔨᐤ ᐄᓅ ᑎᐹᔨᐦᒋᒑᐎᓂᐦᒡ᙮ ᒋᔥᑎᒫᐎᓐ ᑭᔮᐦ ᒑ ᒌ ᐙᐐᒋᐦᐄᐙᒡ ᐊᓂᒌ ᑎᔮᐦᑭᐦᐆᑯᒡ ᒑᒀᔨᐤ, ᑭᔮᐦ ᑯᑎᑭᒡ ᐊᐙᓂᒌ ᐋ ᐊᑎ ᐹᐦᐹᔨᑯᒡ ᑭᔮᐦ ᐋ ᐊᑎ ᒫᒨᐱᒡ ᐅᐦᒋ ᐊᓂᔮ ᐋ ᐃᔑ ᐱᒥᐱᔨᐦᑖᒡ ᒑᒀᔨᐤ ᐅᒌ ᑳ ᒫᒨᐱᒡ ᐋ ᐙᐙᐱᐦᑎᐦᒡ ᐋ ᐃᔑ ᑖᐦᑭᐦᐄᒑᐱᔨᔨᒡ ᒑᒀᔨᐤ ᐋᒄ ᒫᒃ ᒑ ᒌ ᒋᔅᒑᔨᐦᑎᐦᒡ ᐊᓂᔮ ᒑᒀᔨᐤ ᐋ ᐃᔑ ᐋᔨᒫᔨᐦᑎᒥᐦᐄᐙᔨᒡ ᐊᓂᑖᐦ ᐋ ᐊᑎ ᐃᐦᑖᓂᐎᔨᒡ, ᒥᒋᓐ ᐋ ᓈᓈᑭᒋᐦᑖᑭᓂᐎᒡ ᐊᓐ ᐋᓂᔅᒑᐤ ᒋᔅᒑᔨᐦᑎᒧᐎᓐ ᐅᐦᒋ ᐊᓂᑖᐦ ᐄᔨᔨᐤ ᐃᐦᑖᐎᓐᐦ᙮

ᒫᐅᔮ ᐋ ᐃᔑ ᒋᔅᒋᓂᐙᐱᐦᑎᐦᒡ ᐊᓂᒌ ᑳ ᒫᒨᐱᒡ ᑳ ᐙᐙᐱᐦᑎᐦᒡ ᐋ ᐃᔑ ᑖᐦᑭᐦᐄᒑᐱᔨᔨᒡ ᒑᒀᔨᐤ:

a. ᐋ ᓈᑭᑎᐙᔨᐦᑖᑭᓂᐎᔨᒡ ᐄᔨᔨᐅᒡ ᐅᑭᔅᒋᐦᐅᐎᓂᐙᐤᐦ ᐅᐦᒋ ᐋ ᓂᑑᐦᐅᒡ, ᐋ ᓅᑎᒫᓵᒡ ᑭᔮᐦ ᐋ ᐎᓂᐦᐄᒑᒡ;
b. ᐋ ᓈᑭᑎᐙᔨᐦᑖᑭᓂᐎᒡ ᐱᒫᑎᓰᐎᓐ ᑭᔮᐦ ᐊᔅᒌ;
c. ᐋ ᓈᑭᑎᐙᔨᒫᑭᓂᐎᒡ ᐄᔨᔨᐅᒡ ᑭᔮᐦ ᐅᑎᑎᔅᑳᓈᓯᐎᓂᐙᐤ, ᐅᑎᐦᑖᐎᓂᐙᐤᐦ ᑭᔮᐦ ᐅᐱᒫᔅᒋᐦᐅᐎᓂᐙᐤᐦ;
d. ᐋ ᓈᑭᑎᐙᔨᐦᑖᑭᓂᐎᒡ ᓂᑑᐦᐅᐎᓐ, ᐊᔅᒌ ᑭᔮᐦ ᐋ ᐊᑎ ᓂᐦᑖᐅᒋᐦᒡ ᒑᒀᓐ, ᑭᔮᐦ ᓂᓈᐦᑰ ᐋ ᐊᑎ ᓂᐦᑖᐅᒋᐦᒡ ᒑᒀᓐ ᐊᔅᒌᐦᒡ;
e. ᐅᑭᔅᒋᐦᐅᐎᓂᐙᐤᐦ ᑭᔮᐦ ᑳ ᐃᔑ ᐊᔓᑎᒧᐙᑭᓂᐎᒡ ᐄᔨᔨᐅᒡ ᐊᓂᑦᐦ II ᑳ ᐃᑎᓯᓈᑖᔨᒡ ᐊᔅᒌᔨᐤ;
f. ᒑ ᐙᐐᒋᐦᐄᐙᒡ ᐄᔨᔨᐅᒡ ᐊᓐ ᐋ ᐱᒥᐱᔨᐦᑖᑭᓂᐎᒡ ᐐᔓᐙᐎᓐ ᐅᐦᒋ ᐋ ᓈᑭᑎᐙᔨᐦᑖᑭᓂᐎᒡ ᐊᔅᒌ ᑭᔮᐦ ᐱᒫᑎᓰᐎᓐ;
g. ᐅᑭᔅᒋᐦᐅᐎᓂᐙᐤᐦ ᑭᔮᐦ ᐋ ᐃᔑ ᓂᑎᐙᔨᐦᑎᐦᒡ ᑯᑎᑭᒡ ᐋ ᐃᑎᔅᑳᓈᓯᒡ ᐊᐙᓂᒌ ᐋᑳ ᐄᔨᔨᐤ ᐃᑎᔅᑳᓈᓯᒡ;
h. ᐅᑭᔅᒋᐦᐅᐎᓐ ᐊᓐ ᐊᐙᓐ ᐋ ᓈᓈᑭᒋᐦᐄᑯᑦ ᐐᔓᐙᐎᓂᔨᐤ ᒑ ᒌ ᐱᒥᐱᔨᐦᑖᑦ ᑯᔨᔅᒄ ᐋ ᐃᔑ ᐐᔓᑖᔨᒡ ᐋᐱᑎᓰᐎᔨᐤ᙮